快樂人生: 2010 立山黑部旅遊 Day 1

回港一個禮拜，係時候寫遊記喇。寫遊記有兩個目的，第一個係記錄旅程美好既回憶，其次係為有緣人提供相關旅遊資料。今次係跟縱橫遊既立山黑部團 JGG5，特點係包括一般旅行團唔會去既地方上高地。今次行程除左天不造美外，我對其他一切都好滿意。好！先來第一日既旅程！

第一日 (23-10-2010) 朝早 8:30AM 同大人到達機場集合，過關後跟同日出發去上海既朋友食早餐，10:30AM 出發往名古屋國際空港。 3:30PM 左右抵達名古屋，由於旅遊車仲未到，領隊俾左 20mins 我地係機場裡面行下，不過我搵唔到矢場とん既味噌豬扒，似乎緣慳一面，之後我地就直接去食晚飯喇。咁快食晚飯！？唔會掛！？無錯！大約5:15PM 就去到餐廳，好在個手桶御膳賣相唔錯又幾好味，如果唔係真係食唔落。

食飽飽後坐左一陣車就去到名古屋電視塔，開始個半鐘既掃貨行程。其實出發前我地已經 plan 定要去既地方，包括三越既 Agnes b 同埋 Fancl，仲有要去食世界のやまちゃん既幻の手羽先(雞翼)。解散後第一時間同大人去三越，可惜係 Agnes b 睇唔啱款，而 Fancl 又無大人要買既野，最後都係零收獲而回。唯有再戰榮地下街，睇下有無其他野可以買。行左一陣，見到桂新堂既分店，試下 D 蝦餅先．．．蝦味好濃，味道唔錯，於是就同大人買左四包。事後計番都真係幾貴，為番港幣 $10 一塊 -_-" 之後出番地面想搵世界のやまちゃん，但係搵極都搵唔到，又就到集合時間，唯有放棄，真係有 D 失望．．． 8:00PM 於電視塔集合，5-10mins 就番到 Nagoya Westin Hotel，結束第一日既旅程。最激氣既係番酒店上網先發現世界のやまちゃん既網址，裡面有分店地址同地圖，唯有嘆句同幻の手羽先無緣。其實之後仲落左街行左陣想搵雞翼食，但係酒店附近真係太黑又無野行，所以行左陣都係番酒店休息算。