影完之後即刻同大人衝入室內，自己就趁能見度未太低時翻轉頭冒雨再影多幾張，但唔夠五分鐘眼前已經一片白濛濛了。係黑部湖駅等地下纜車果陣有人兜售立山黑部寫真集，每本只係賣 1000 円，價錢絕對吸引！不過無理由於拎住本寫真集上山掛，所以都係唔買住。大概 10:20AM 我地就去到黑部平喇，不過仍然係乜都睇唔到...
室外無野睇，唯有係室內睇下手信。
行左陣就要去坐第三種交通工具空中纜車喇，室外仍然白濛濛一片乜都無得睇。上到大觀峰能見度就更低，基本上都係無風景睇。大約 11:30AM 再坐無軌電車往海拔 2500 米既室堂。室堂係我地食晏既地方，因為仲未到食飯時間，領隊叫我地四圍行下先，12:15PM 係餐廳門口集合。天雨加上大霧，原本應該爭住影相既 "標高 2450 米" 石頭周圍想搵個人都難。
是日午餐 "山菜定食"，食材係簡單 D，但唔係出發之前講到咁差喎。
食飽飯四圍行，發現之前係黑部湖駅見到果本寫真集！每次去旅行，我都會買本當地既寫真集做紀念，當然今次都唔會放過呢本抵到爛既寫真啦。
買完再係室堂既簡易郵便局隔離自行印齊哂六種交通工具既圖案係本寫真集尾尾空白既地方上面，整埋個日期，真係極具紀念價值！大概 1:30PM 我地就坐高原巴士去美女平了。由室堂去美女平要 50 mins，領隊話平時呢一段係欣賞立山風景既好時間。不過都係果句，白濛濛都無乜野睇到，大人仲趁呢個時候覺豬仔... 一覺訓醒到左美女平又要等車，今次係等地下纜車落番立山駅。
2:30PM 我地去到立山駅，領隊話時間尚早，安排今日去埋第四日行程裡面既兼六園喎。我同大人暗中偷笑，因為咁即係話之後果日可以早 D 落大阪 shopping 呀。
坐左個半鐘頭車終於去到金澤既兼六園喇。
遊園時間大概有一個鐘，話多唔多，話少唔少，視乎遊園者鍾唔鍾意花草樹木。呢種天氣已經令我對影到靚相抱有零希望，慶幸既係停左雨，唔駛再擔住把摭。領隊好用心咁幫團友遂個係琴柱燈籠呢個必影位影相，當然我同大人都唔執輸啦。
基本上陰天下未有紅葉既兼六園無咩特別，所以我地都唔覺係咩特別名勝... 隨著兼六園 5:00PM閂門，我地都緩緩離開。行番去旅遊巴途中，望見對面既金澤城公園門口成地紅葉，似乎比兼六園更加吸引。
上車之前領隊去左間鋪頭買雪糕食，唔知點解，佢買完之後個個團友都跟住買，慌死蝕底咁。唔駛講我同大人肯定唔會執輸，揀左人氣 NO.1 既芝麻雪糕加綠茶軟雪糕甜筒，味道唔錯架。
是晚住宿高岡新大谷酒店。7:00PM 我地係酒店食自助晚餐，選擇唔算多，不過味道都 OK，大人仲特別鍾意個波菜意粉呢！
食飽飽之後出左去附近散步，跟住就番酒店休息了。話說係酒店既時候發生左段小插曲，大人手多多按左電視遙控既 "有料" 制，睇左幾秒咁大把知唔到路即轉 "無料"，事後仲有 D 驚第日朝早 check out dor 既時候要俾錢添，哈哈！
立山黑部官方網頁 http://www.alpen-route.com/
沒有留言:
張貼留言