2011 曼谷華欣之旅 Day 4 - Let's Photo Again

第四日 (12-OCT-2011) 5:30am 醒左，有一剎那既衝動想走出去海灘影日出，無奈人之初性本懶，結果我都係選擇繼續訓...

6:30am 再次醒左，呢個時候個天已經開始光。終於我的起心肝拎相機，只係上天台影左兩張相 =P


其實諗番真係覺得好可惜，自己都唔知已經幾多年無睇過日出喇。而家就連早少少起身，行兩步到沙灘都懶，實在有些少後悔... 影完相繼續訓到 8:00am 起身，大概 9:00am 去食海景早餐。


個 french toast 同埋杯 coffee 真係值得一再番兜！


是日朝早既節目同尋日一樣，都係係酒店影相，唔同既係我地呢日去左泳池玩左成兩個鐘 ^0^


玩完水曬完太陽，1:30pm 我同大人係 Let's Sea check out (我地問過 late check out 最遲 2:30pm)，放低行李就出去 Market Village 食晏。再見喇，大人最鐘意既 sofa...


再見喇，28 號房門口既馬騮...


是日午餐係日本野 Fuji，頭盤係好好味既軟殼蟹沙律~


主菜係定食同埋鰻魚飯，我地仲叫左杯椰汁~



雖然呢餐好好味，不過大人食左一陣就覺得胃痛，真係陰公豬... 食飽之後我地就番 Let's Sea 叫 staff 幫我地 book taxi 去 mini bus station... 上車前 D staff 仲俾左兩支冰凍既飲品我地，兼且企哂係度 say goodbye，呢 D service 真係貼心到極... 再見喇，我地最愛既 Let's Sea...


去到 mini bus station 之後我發覺同想像中既上車地點有 D 出入，因為之前上網做過 research 話係 ESSO 油站附近上車，應該同早幾日落車既地點差唔多... 張 ticket 都同黎果程唔同樣~


Anyway 車費都係一樣 180 Bhat / person，去得到 Bangkok Victory Monument 就 OK！呢個車站班次都算密，每半個鐘頭就有一班，兼且唔駛等上滿人都會開車，非常方便。而且架車比我地黎果程果架新淨同舒服得多，even 坐最後既都唔駛屈埋雙腳~


上左車之後我地等左十分鐘 15:30pm 開車，同車既只有一對泰國小情侶。因為塞車既關係，而司機又兜左對情侶去某個地方落車，結果我同大人成程車足足坐左 4 個鐘！雖然落車既地點係 Victory Monument BTS 下面，不過行去 Pullman King Power 都要大概 10 mins~



7:30pm 我地終於 check in，交低 2,000 Bhat deposit。不過 "五星級" 既 Pullamn 並無我地想像中咁靚，感覺比較商務式唔夠 relax！當然相對前兩晚住既 Let's Sea，Pullman 更加有一種被比下去既感覺...



放低行李之後我地即刻出去食水門雞醫肚 (紅色衫果檔)，每人叫左碟雞飯，正！


不過因為大人個胃又唔舒服，所以我地唯有食完就即刻番酒店。但係一碟雞飯又邊度會食得飽我呢？既然係咁，我就順路係綠色衫檔雞飯度買外賣做個比較，再係酒店附近買左串串燒番去慢慢食。原來，真係好似 D 人咁講紅色衫果檔好味 D 架！


Reference Links:
Fuji Japanese Restaurant
Let’s Sea Hua Hin Al Fresco Resort
Market Village
Pullman Bangkok King Power Hotel

2011 曼谷華欣之旅 Day 3 - Let's Photo

第三日 (11-OCT-2011) 晨早 8:00am 就起左身喇。9:00am 去到餐廳既時候兩個無敵海景位已經有人坐緊，我地唯有退而求其次揀內園景啦！Let's Sea 既早餐並唔係 buffet，不過都好豐富。選擇方面有好多，味道亦都好好，一 D 都唔求其。如果 order 咖啡仲俾埋 Macadamia Syrup 同埋 Caramel Syrup，俾你自由發揮！

是日朝早既節目係係酒店影相。食飽飽之後同大人番房帶埋心愛既無敵兔係酒店漫步，由海邊開始...


經過仲未開門既手信店，大人俾門口好可愛既豬仔繩深深吸引~
(第二日我地問過條豬仔繩要成 HKD100，所以最後都放棄了)


下一站係泳池旁邊既 Sand Bar，游游下水係度飲番杯冰凍飲品真係一流！


Let's Sea 真係好靚，個個位置隨手都可以影出靚相 =)




同大人影左成朝相，唔覺唔覺已經到食晏時間。出發前我已經 plan 左會食茅屋炸雞，係 lobby 先問下 Let's Sea 既 staff 點去，一問佢地已經知道我地想去既地方，真係醒目。12:30pm 我地坐酒店 book 既車出發，去食充滿期望既炸雞！


如果唔係見討論區有介紹既話，其實都唔會去呢間外表平平無奇既茅屋炸雞店


茅屋裡面都好簡約，大部份光線都係採自然光~



我地叫左個兩件招牌炸雞(50Bhat/pc)、一件釀雞膇(50Bhat/pc)、一碟青咖哩雞撈米粉(90Bhat/pc)、一碟三味炸雞(70Bhat/pc)仲有一個超甜既椰青。件釀雞膇同埋碟撈米都算唔錯，其他既就唔太 recommended 了。



食完飯我同大人沿住條馬路向北行唔夠 10 分鐘就已經見華欣火車站個牌喇！(好彩唔係好遠，如果唔係大人實投訴)


咁啱有架火車到站，真係好似預左我黎影相咁，哈哈！



仲有黎送行既人~


火車站既範圍唔係好大，週邊有一個用車箱做既圖書館，裡面都幾靚幾特別。不過華欣火車站呢個景點就似乎唔係太啱大人，所以我地行左 20 分鐘就走了。



下一站係愛與希望之宮，the next station is Marukataiyawan Palace。好可惜火車站方圓 200 米似乎都唔見有 taxi 既存在，我同大人唯有慢慢向大街果邊行碰碰運氣。我地行左大概 5 分鐘，好好彩地有架篤篤停左係路邊。一位笑容滿面、感覺好親切既大叔話 two way 600 Bhat，其實係無得選擇既情況下我地點都 ok 架啦。由於篤篤行得比較慢，從火車站去愛與希望之宮需要 20 分鐘車程，大人亦趁呢段時間休息左陣。

2:45pm 我地終於到左喇，第一時間梗係買飛啦。兩點後先入場，仲可以買埋上高腳樓既門票添！因為大人著住吊帶裙既關係，入宮面聖之前一定要著沙龍 (搵塊布包住下身再褸件披肩)，放低埋本 passport 做抵押先 OK！


望住入口個泰文地圖，都唔知邊度打邊度...


愛與希望之宮裡面唔多遊客，所以感覺都好寧靜。



如果可以走到最出吹下海風就 perfect~


行完地下之後我地就準備上樓上。上樓上既入口只得一個，我地都係跟人行先去到。不過問題黎喇... 上去之前我地要除鞋同埋太陽眼鏡。除鞋當然無問題啦，至於太陽眼鏡... 因為我副太陽眼鏡係配左度數同埋散光，而我又無帶副普遍眼鏡係身，所以上左樓上之後我乜都睇唔到！唯有好乖咁跟住大人行啦...

我地按原定時間 4:00pm 離開，等左成個鐘既篤篤大叔仍然笑容滿面咁接我地走。4:30pm 番到酒店房之後 Let's Sea 為我地準備左支免費既礦泉水，咁貼心既服務真係值得一讚！趁仲未夠鐘食飯，我地出去海灘果邊影下相先~

是日晚餐係 La Mer Restaurant 既泰國菜。我地坐酒店 call 既 taxi 7:00pm 出發，唔駛 15 分鐘車程就已經到左餐廳。我地揀左個近海既位，不過其實夜晚黑媽媽乜都睇唔到...



我地叫左個蟹肉炒飯、一籃螄蚶、一碟公車腩霸同埋一條炸魚。Overall 味道唔錯，生蝦好大隻，螄蚶更加係大到我從未見過！不過略嫌蟹肉炒飯有少少蟹殼。



其實呢餐唔係食左好耐時間，食到中段既時候我仲要搏命食務求盡快埋單！事緣大人極度怕貓，而偏偏 La Mer Restaurant 有唔少貓貓狗狗流連，所以入到餐廳既時候大人已經有 D 驚。食到中途突然有隻貓走過來，嚇到大人成個彈開，旁邊既侍應完全唔知發生緊咩事！所以奉勸各位怕貓狗既朋友去 La Mer Restaurant 之前真係要三思，哈哈！

倒哂 D 野落口之後我地就坐 taxi 去 Hilton Hotel 附近行下，9:15pm 再到 Elephant Thai Massage 做兩個鐘 Thai Massage。之前上網見好多人都讚 Elephant Thai Massage，但我同大人都認為技師按得太大力又無乜 heart，相比泰國其他按摩店絕對唔算得上好，不過每人 400 Bhat 兩個鐘咁平就算吧！

11:30pm 番到酒店，唔知點解每次見到呢個 view 無論日與夜都忍唔住要按一下快門~


Reference Links:
Elephant Thai Massage
Hua Hin Railway Station 華欣火車站
La Mer Restaurant
Let’s Sea Hua Hin Al Fresco Resort
Mrigadayavan Palace 愛與希望之宮