第二日 (24-10-2010) 朝早 7:30AM 係酒店食早餐，食完趁仲有 15mins 先出發拿拿臨出酒店外影下名古屋城先。雖然今次無機會入名城公園走一轉，但係可以望下名古屋城影番張相，都算係咁啦！
8:00AM 正式出發！大概 11:30AM 終於去到今次行程既重點之一，有神鄉地之稱既上高地。天氣雖然多雲無陽光，但係亦難掩大正池既美態！當然，如果有陽光既話，我會發左癲咁不停影好多好多靚相！
其實今次選擇 JGG5 的目的，就是要一睹大正池藍天白雲既景色。係網上睇見人地影既藍天白雲大正池，真係一見鍾情，實在令人神往！可惜今次緣慳一面，唯有影張陰天倒影當係安慰獎吧！
就係呢個時候，唔只天不造美，就連自己既身體都唔爭氣！行行下竟然肚痛，仲要好痛果隻！荒山野嶺要搵茅廁真係何其困難，唯有行快點祈求快點搵到廁所！沿途 miss 左唔少影相機會，不過無辦法．．．行左最少半個鐘，終於見到夢寐以求既廁所喇！(呢個故事教訓我地去旅行一定要每朝係酒店方便左先！) 解決完生理需要之後，發覺自己已經身處田代橋。好！係時候再次揹上相機上路。
因為陰天散射光既關係，大部份影既相同影得好既相都係同大人影既人像照 (唔知大人收唔收貨呢？) 沿途漫山紅黃綠，並唔係全個山頭一片紅色，不過正如領隊話齋要好似交通燈咁三隻色都有齊先靚。大約行到 1:30PM，差唔多到達河童橋喇。
河童橋有無河童？邊個知呀？不過就有一堆同河童有關既手信。由於是日午餐係食自己，去到河童橋第一件事就係搵食。時間關係，我同大人隨便揀左間餐廳就入去。餐牌全部都係日文，好彩都有Ｄ圖片俾我地指下指下。大人叫左個日式咖哩豬扒飯，而我就叫左個油漬魚蕎麥麵。雖然個蕎麥麵既味道都算唔錯，但係大人個咖哩豬扒飯就真係 oishi，Ｄ日式咖哩甜甜地又不失香味，正！
食飽飽之後離集合時間只剩約 20mins，但係我仲未同河童橋影靚相呢！於是我同大人兵分兩路，我就去影相，而大人就行手信店。基本上成條河童橋都係人，要係短時間內搵一個好既拍攝點絕對唔容易，不過唔理得咁多喇，抓緊時間影影影．．．
開心既時間過得特別快 (其實係唔夠時間)，大約 2:30PM 我地係上高地既 bus terminal 坐車離開，出發往水果園。
去水果園既車程大概一個鐘，但係天氣已經由天陰轉為落雨。呢期既時令水果係蘋果，老實講，水果園既蘋果質素真係好普通。加上落雨既關係，包括我地在內，團友們都唔係太想冒雨摘蘋果，真係貪 "浪漫" 咩．．．最後我地拎住 10 個蘋果 (每人可以摘 4 個，另外送 1 個)，拿拿臨走上車番酒店。
呢晚住宿白馬東急溫泉酒店。番到酒店大概 6:30PM，放低行李後 7:00PM 開飯，是日晚餐酒店既日式料理，味道都算 OK。
食完晚飯後，係便利店買左個綠茶雪糕同大人番房歎。
由於房間有暖氣完全唔覺得凍 (甚至有Ｄ熱)，加上經過全日既行程實在有Ｄ累，我同大人都無去到浸溫泉。另外從網上得知，呢間酒店既房間設有露台，但係偏偏分配俾我同大人果間就無！原本 plan 左呢晚影星星，都唔知好彩定唔好彩，撞正落雨，如果唔係我實投訴佢唔分間有露台既房俾我地，哼！
上高地官方網頁 http://www.kamikochi.or.jp/chinese_trad/
上高地官方網頁 http://www.kamikochi.or.jp/chinese_trad/
沒有留言:
張貼留言