雖然話高岡大佛係日本三大佛之一，但係成個景點範圍就真係有 D 細。影左大約十五分鐘已經係時候行番酒店。
8:30AM 係酒店出發去白川鄉，車程只不過係一個小時。我地首先係去白川鄉天守閣展望台，睇下白川鄉既全景先。
再黎一張移軸鏡效果：
其實展望台果度有幾位拎住 Full Frame 機既工作人員可以幫遊客影相，俾部單反佢地幫手影絕對唔係問題，但係注意如果用佢地部機影就要俾錢架喇！另外，展望台隔離有間手信店，裡面除左有合掌屋之外，仲有唔少日本國寶 Hello Kitty 既手信。
話咁快我地就進入白川鄉，10:30AM 解散自由活動喇。之前上網已經 print 定白川鄉幅地圖，但係我發覺就算拎住都唔知自己係邊，唯有見路就行。
沿途仲有 D 要俾錢先可以入去參觀既合掌屋，不過因為大人唔想入去同埋要錢既關係，最終我地都係無入到，只係係周圍同大人影下靚相。係呢個時候，最唔想發生既事又再次發生喇，落雨！雖然好似幾浪漫咁，但講真都唔係咁方便，唯有行去買期待已久既飛驒牛肉串，順便避下雨。
飛驒牛唔韌仲幾有牛味，另外我地再叫左個牛肉碎炸薯餅呢。因為我需要買張名信片俾朋友既關係，我地求其行左入一間手信店。睇下 D 名信片，我同大人先驚覺原來白雪中既白川鄉係最靚架！不過，我成日都話，睇靚景影靚相係要有代價既，冬季既白川鄉一定凍到傻！11:30AM 我地揀左一間餐館食飯，我叫左個味噌吉列豬扒飯，味道 OK 既，不過就唔及河童橋個豬扒飯好味喇。而大人就食炸蝦天婦羅蕎麥麵，都好好味架。
食飽飽後又差唔多到 12:30PM 既集合時間。由於低溫加上落雨，凍上加凍，行左一段路之後大人已經不顧一切咁走往旅遊車既方向。與此同時，作為一個唔識影相既影相佬，我把握上車前既最後機會亂影，一於影番夠本！
終於要離開白川鄉喇，接住落黎既就係往大阪五小時既車程！旅遊巴慢慢駛離白川鄉之後，奇蹟出現喇！雲層中穿透著一絲絲既陽光，藍天就係我地既眼前！正當全車團友表現得興奮，我就有 D 感概個天玩野，戶外行程就日日落雨，行街 shopping 就藍天白雲！？大概 2:30PM 車就停左係中途站休息休息，我地就買左人氣 NO.1 既小食同飲免費綠茶消磨時間。到達大阪既時候仲未到食飯時間，5:30PM 我地係難波解散去 shopping，我同大人梗係第一時間去 agnes b 同埋其他鋪頭睇下有無合適既銀包啦，仲有唔少得同固力果人影下相。
行左一陣就差唔多要食飯喇，7:00PM 我地就去到難波既一間餐館。是日晚餐係神奇紙火鍋料理，有幾神奇！？搵火燒住張紙都唔著火，孤陋寡聞既我梗係覺得神奇啦！
食完飯我地就番是晚酒店大阪喜來登都。原本我同大人都對 Sheraton 充滿期望，但係一去到之後呢個期望就即刻被打入谷底。無他，Sheraton Miyako Hotel Osaka 實在太舊，連個大堂都俾唔到一種 grand 既感覺我，無計啦。番酒店休息左陣，我就同大人出左去附近既激安之殿堂 shopping，步行五分鐘就到。雖然激安之殿堂主要係賣 D 野食同日用品，但係我同大人都行左好耐而且買左好多野先走。番到酒店，同今次日本旅程既戰利品影下相先！由於數量太多，以下相片不能盡錄。
白川鄉官方網頁 http://www.shirakawa-go.gr.jp/
大阪喜來登都酒店 http://www.miyakohotels.ne.jp/osaka/
激安の殿堂 http://www.donki.com/index.php
沒有留言:
張貼留言